Mustela

- Hei, eg heiter Mustela, og eg er ei røyskatt. Eg likar å lese om naturen men også triste bøker.

Hjemme hos Mustela

Eg heiter Mustela og er ei røyskatt.

Eg har familie både nord i Asia, i Nord-Europa og i Nord-Amerika. Her i Noreg har eg tanter, onklar og syskenborn ved kysten og på fjellet. Sjølv likar eg meg best i skogen.

Sist vinter var det nokon som trudde eg var ei snømus. Då blei eg litt fornærma. Eg et faktisk mus. Er det nokon som pleier å forveksle deg med din middag, kanskje?

Rett nok er pelsen min heilt kvit på vinteren, nett som snømusa si. Men inga mus i heile verda har slik ein fin og svart haletipp som meg.

Eg skiftar pels frå brun til kvit når vinteren kjem. Men haletippen min er heile tida svart.

No gøymer eg halen min bak ryggen, men viss du søkjer etter meg på internett, kan du sjå bilete av han.

Eg er veldig glad for at så mange av dykk stemte på meg, sånn at eg fekk lov til å flytte inn her i Leseskogen.

Då eg først høyrde om Leseskogen, trudde eg at bøkene voks på trea her. Det gjer dei jo ikkje. Men eg har møtt Sciurus, Gulo, Ursus, Lynx, Lupus og Lepus. Dei er veldig snille og har lånt meg bøker som eg har fått lov til å ha i bokhylla mi.

Eg håpar eg får nokon eigne bøker snart. Kanskje de kan gje meg nokon?

Eg likar best bøker som handlar om alt som lever i naturen. Samstundes synest eg bøker som er litt triste, ofte er veldig gode.